O PP da comarca reclama ao bipartito da Deputación que recupere o apoio ao tecido asociativo da provincia
Por Redacción
O voceiro do grupo provincial do Partido Popular, Ángel Moldes, reuniuse esta tarde en Vilaboa cos alcaldes e voceiros do PP na comarca de Pontevedra, para comezar a traballar nas propostas que os populares farán de cara aos orzamentos da Deputación de Pontevedra para 2017.
Na reunión, á que asistiron representantes populares da cidade de Pontevedra, Vilaboa, Barro, Campo Lameiro, Ponte Caldelas, Poio, Cerdedo-Cotobade e A Lama, insistiron en reclamar ao goberno bipartito que recupere o apoio ao tecido asociativo de toda a provincia que, ao seu xuízo, foron uns dos grandes prexudicados este ano, xunto aos pequenos e medianos concellos da provincia.
Nesta liña, recordaron que foron moitos os colectivos que "non recibiron ningún tipo de apoio" este ano da institución provincial.
Outra das críticas amosadas durante a reunión foi a "falta de diálogo do bipartito" e, sobre todo, da presidenta Carmela Silva cos alcaldes da provincia.
No encontro, os populares tamén coincidiron ao denunciar o "estado de deterioro e abandono das estradas provinciais", e insistiron en reclamar ao bipartito que poña as máquinas a funcionar para limpar as vías provinciais e poñelas a punto para garantir maior seguridade a condutores e peóns.