O Grove promove medidas de igualdade
Por Redacción
O Concello do Grove ven de poñer en marcha unha serie de actividades que ocuparán o mes de novembro coa finalidade de incidir na formación en igualdade e, especialmente na prevención da violencia de xénero.
O programa componse de tres liñas básicas de actuación. A primeira delas denomínase "Eu, ti, NosOutrxs. Trans*hitos vitais. Identidades en proceso de cambio. Guía de exploración para xente curiosa" e componse de tres obradoiros monográficos sobre xéneros, identidades, sexualidades e amores.
Así, o primeiro deles deu comezo onte e estenderase ata o vindeiro xoves en horario de 17.00 a 20 horas e baixo o título "Manual básico en xéneros e feminismos". Xa a vindeira semana, o 15 e 17 de novembro de 17 a 20 horas terá lugar o segundo dos obradoiros sobre "Sexualidades de diversidades" e do 22 a 24 de novembro, no mesmo horario o taller "Amores e amor romántico. Quererse ben". Todas estas actividades terán lugar na Casa da Cultura Manuel Lueiro Rey.
A segunda das actividades previstas é o "Clube de emprego para mulleres" que se celebrará o 2, 9, 16 e 23 de novembro en horario de 18.00 a 20.00 horas na Casa da Cultura. Trátase dunha proposta de auto diagnose para facilitar o proceso de auto coñecemento e reforzo da autoestima que pretende acompañar (tanto no persoal como no ámbito laboral) á mellora do emprego.
Finalmente, a terceira actividade, busca promover a transmisión interxeracional do coñecemento e da memoria histórica a nivel local baixo o título "Sabias, saberes e memorias. Aulas de estimulación cognitiva e memoria das persoas maiores dende unha perspectiva de xénero". Esta actividade está composta por 4 sesións de unha hora e media e as datas de celebración da mesma serán comunicadas nas vindeiras semanas.
Toda a información sobre estas actividades poderá ser consultada a traves do Centro de Información á Muller do Concello do Grove.