A valedora do pobo pide maior conciencia de familias e autoridades sobre os menores nos botellóns
Por Redacción
Os últimos casos de intoxicacións etílicas de menores de idade participantes en botellóns non pasaron desapercibidos á valedora do pobo, Milagros Otero, que lembra a "urxente necesidade" de que os poderes públicos tomen conciencia deste problema e adopten medidas para a súa erradicación reforzando o control, a vixilancia e a supervisión. En especial, na súa opinión, os concellos, como administración máis próxima, son os que deben mostrar unha especial sensibilidade ante este tipo de consumo.
A institución do Valedor do Pobo xa mostrara unha especial preocupación sobre esta problemática no ano 2011, cando realizou unha gran actuación de oficio ante as sete principais cidades de Galicia ante a presenza de menores nos botellóns. Agora volve sacar o asunto a colación ante a vixencia da situación e o seu incremento nas últimas semanas.
Milagros Otero lembra que o interese superior do menor, recoñecido na Convención de Nacións Unidas de Dereitos do Neno, esixe que os poderes públicos leven a cabo labores de supervisión para a protección da súa saúde física e mental e a lei autonómica galega 11/2010 de prevención do consumo de bebidas alcohólicas en menores de idade prohibe inxerir bebidas alcohólicas con menos de 18 anos. Ademais, establece un sistema de infraccións e sancións para tratar de asegurar o cumprimento das súas previsións.
Á vista das normativas vixentes, lembra a necesidade de aplicar accións educativas e preventivas, así como as intervencións sancionadoras. Neste sentido, considera que deben facerse controles investigación e sanción especial aos establecementos de venda de alcol ou ás persoas que provén aos menores destas bebidas.
Ademais, lembra a relevancia do aspecto educativo que, neste ámbito, deben desenvolver as familias como responsables directas de transmitir ás novas xeracións unha cultura de non tolerancia no consumo de alcol a idades tan temperás.