O impulsor da "folga" de deberes participará nun observatorio na Biblioteca sobre o cambio educativo
Por Redacción
José Luis Pazos está a converterse nun referente para aqueles pais e nais que defenden a eliminación dos deberes para que os menores poidan ter máis actividade de lecer e de tempo de convivencia coa familia. Pazos, presidente de CEAPA, puxo en marcha unha campaña solicitando ao profesorado que non envíe deberes durante os fins de semana aos estudantes ao longo deste mes de novembro. O impulsor deste movemento será un dos relatores no Observatorio socioeducativo Inspira, unha proposta presentada este mércores na Biblioteca de Pontevedra e que se vai a desenvolver en seis sesións, os primeiros sábados de cada mes, desde novembro ata abril de 2017.
Nestas xornadas búscase unha iniciativa para atopar e compartir propostas de mellora no ámbito socio-educativo a través de iniciativas pioneiras. Rocío Gómez Juncal, coordinadora deste proxecto, presentaba en compañía da directora da Biblioteca de Pontevedra, Pilar Fernández, este Observatorio que comezará o 5 de novembro coa intervención de Luisa Márquez, coordinadora galega da Rede de Escolas da Unesco e educadora no IES Luís Seoane. O 3 de decembro, Patricia e Francisco Soto, integrantes da marca téxtil La Canalla, explicarán os seus talleres desenvolvidos en centros educativos sobre consumo responsable.
Xa en xaneiro de 2017, o sábado 14, Ainhoa Fervenza, integrante da ANPA do IES Sanxenxo ofrecerá unha exposición sobre o proxecto de creación empresarial en cooperativa que desenvolve con estudantes de 13 e 14 anos do centro.
Eusebio Rivero, licenciado en Belas Artes e profesor interino, mostrará a aplicación de accións artísticas con escolares ek sábado 4 de febreiro. A profesora de educación infantil María Bóveda ofrecerá unha sesión analizando a súa experiencia entre persoas cegas e escolares en relación coas sensacións que lle transmite o mar.
Por último, o 1 de abril, José Luis Pazos pechará este ciclo analizando e debatendo sobre os deberes e das reválidas.
Nas sesisones elaborarase un panel de solucións e habilitarase un blogue para colgar as charlas e os comentarios sobre os cambios educativos propostos.
A entrada é libre e non é necesaria unha preinscrición.