Un grupo de condutores expresa a súa indignación tras ser multados en San Amaro "por culpa dun valo mal posto"
Por Redacción
A Policía Local de Pontevedra multou a varios condutores "por no obedecer una señal de prohibido circunstancial". A sanción é de 250 euros.
Sucedeu o pasado luns 31 sobre as cinco da tarde. Unha das medidas incluídas no Plan de tráfico deseñado con motivo da festividade de Todos os Santos foi o corte da rúa do Camposanto. Con tal motivo colocáronse unha serie de valos coa sinalización oportuna.
O problema, segundo explicaron os condutores multados, é que o valo estaba "mal posto" xa que estaba situado fronte a un camiño e non no medio da estrada que pretendía cortar.
Alleos a esta prohibición os vehículos foron pasando pola rúa do Camposanto ata toparse cun axente da Policía municipal que lles deu o alto e procedeu a sancionarlles.
Aínda que os condutores tentaron xustificar porqué pasaron co coche ata o cemiterio de San Amaro o axente fixo "caso omiso" destas explicacións mentres outro policía procedía a corrixir a colocación do valo, acendendo os ánimos dos sancionados.
A Policía Local de Pontevedra non quixo valorar estas críticas en concreto, pero si recordou que no Concello existe un órgano competente, alleo á propia Policía Local, que valora todas as sancións e ante o que estes cidadáns poden recorrer se están en desacordo.