Entre o 20 e o 30% dos galegos maiores de 20 anos padece unha enfermidade reumática
Por Redacción
O conselleiro de Sanidade en funcións, Jesús Vázquez Almuiña, inaugurou este sábado a XII Xornada Nacional de Artrite celebrada no Hospital Provincial de Pontevedra.
Durante a súa intervención Vázquez Almuiña destacou que en Galicia "as enfermidades reumáticas afectan, aproximadamente, a entre un 20% e un 30% da poboación maior de 20 anos e supoñen un dos primeiros motivos de consulta en atención primaria".
Por ese motivo sinalou que o goberno galego seguirá traballando "na mellora na atención a estes pacientes", que pasa "pola necesidade de traballo conxunto" entre os profesionais de atención primaria e dos servizos hospitalarios.
Con "máis de 200 enfermidades reumáticas" coñecidas supoñen "un dous grandes retos aos que debe facer fronte un servizo de saúde, tanto pola inxente cantidade de recursos sanitarios precisos en todas as etapas da enfermidade, como polo feito de que moitas delas tenden a cronificarse", recoñeceu o conselleiro.
A XII Xornada Nacional de Artrite foi organizada pola Asociación de Enfermos de Artrite de Pontevedra (ASEARPO).