Cortes ao tráfico en Portonovo polo asfaltado no ámbito do porto da lonxa
Por Redacción
Varias rúas de Portonovo estarán cortadas ao tráfico durante a mañá do mércores. Así o obrigan as obras de asfaltados que levarán a cabo na zona portuaria, afectando tamén á rotonda situada fronte á lonxa.
Ademais, outros viarios estarán afectados por unha modificación puntual do sentido da circulación.
As restricións de tráfico produciranse entre as 8 e as 15 horas e afectarán á rúa da Mariña, cuxo tráfico se desviará por Augusto González Besada con saída pola Perla.
Tamén se verán afectados os que baixen polas rúas Santa Catalina, Vitoria, Progreso e Méndez Núñez, xa que terán que subir pola Mariña cara a Augusto González Besada e saír pola Perla.
A rúa Rafael Picó estará cortada desde a rúa Espiñeiro ata a rotonda da lonxa e os usuarios portuarios poderán entrar por detrás destas instalacións.
Durante a mañá do mércores, ademais, non se permitirá a entrada ao porto de trailers nin autobuses.