#Stopbulos nas redes sociais ou por Whatsapp
Por Redacción
Secuestradores de nenos, colonias que te dormen, lambetadas con droga, ritos de bandas que te asaltan na estrada, froitas infectadas de VIH ou inminentes atentados en centros comerciais son algunhas das falsidades que circulan na internet. A Policía Nacional recompilou top ten dos bulos máis compartidos en redes e en mensaxería instantánea nas súas contas de Twitter (@policia) e Facebook e pide aos cidadáns que non axuden á súa difusión.
A petición da Policía Nacional, difundida pola Comisaría de Pontevedra, lembra a importancia de non crer nin difundir mensaxes que non procedan directamente de fontes oficiais, nin a través das redes sociais nin por WhatsApp. E tamén pedir ao resto que non se lle dea credibilidade algunha.
Os grupos de Whatsapp están a desbancar ás propias redes sociais como potentes altofalantes de bulos irracionais, algúns citando falsamente unha fonte oficial; outros que son novas versións de bulos antigos. Os novos gadgets, como smartphones ou tablets, convertéronse en potentes ferramentas para difundir estes bulos. Os especialistas da Unidade de Investigación Tecnolóxica (UIT) e do Grupo de Redes Sociais da Policía Nacional rexistraron miles de denuncias, consultas e peticións de axuda dos internautas a través das canles telemáticas da Policía.
O último destes bulos, unha reedición mellorada dun aparecido en 2014, refírese á presenza dunha parella que se dedica a secuestrar nenos, aos que atraen vendéndolles cromos. Este falso rumor, difundido por WhatsApp, inclúe nesta ocasión unha fotografía e un audio no que unha muller conta a unha coñecida que "díxolle a súa cuñada, que é policía, que hai unha parella tentando secuestrar a nenos vendéndolles cromos...", polo que solicita que se comparta.
A maioría destes falsos rumores son anónimos, non están asinados, aínda que fan referencia a fontes fiables. Ademais adoitan están redactados da maneira máis atemporal posible e carecen de data de publicación para que pervivan o máximo posible circulando na rede. Outro trazo que os define en que contan cun gancho -xerador de medo, morboso ou de tipo económico- para captar a atención do internauta. Tamén tratan de aproveitar unha conxuntura favorable e relacionada coa información falsa, como a comisión de atentados terroristas noutros países.
Os bulos, polo xeral, están escritos en castelán neutro (se empregan este idioma) para facilitar a difusión a nivel internacional naqueles países de fala hispana. Ademais, habitualmente conteñen faltas de ortografía ou unha redacción deficiente. Tamén como característica común atopamos que normalmente inclúen unha petición de reenvío, xa sexa para alertar a outras persoas, para evitar mala sorte ou a morte, concienciar a outros ou con calquera outro motivo. O obxectivo desta petición de reenvío reside en captar direccións de correo, crear bases de datos, transmitir malware, realizar posteriores campañas de correo masivo ou simplemente difundir a información falsa o máximo posible para xerar o medo na poboación.