Aetinape rexeita o carné por puntos para a pesca
Por Redacción
A Asociación española de titulados náuticos pesqueros, AETINAPE, que preside o marinense, Manuel Muñiz, criticou a recente adopción por España do carné por puntos para o sector pesqueiro porque "resulta unha auténtica barbaridade nas relacións laborais e profesionais do sector pesqueiro, xa que presupón unha suposta culpabilización dos profesionais do mar, ataca á súa dignidade profesional e sobre todo sitúa á pesca española en condicións de suspicacia respecto de outras flotas".
Trátase dunha medida máis das establecidas por Europa e adoptadas por España contra a actividade dos profesionais da pesca a bordo dos barcos europeos.
Segundo Aetinape este carné resulta unha medida "excepcional e inxustificada, xa que non está en xogo a seguridade da vida humana nin é unha medida que afecte á práctica totalidade da poboación", sinalan en relación á condución de automóbiles.
Os titulados náuticos pesqueros apuntan que para controlar aos profesionais do mar, os Estados de Dereito da Unión Europea dispoñen de medidas de control suficientes e de réximes xurídicos "que garanten o correcto desenvolvemento das relacións laborais e profesionais".
"A medida supón un auténtico estímulo á deslocalización empresarial"
"Tal e como resolveu a Comisaria de Pesca, María Damanaki, a medida supón un auténtico estímulo á deslocalización empresarial, un gravísimo atentado contra a xa de seu débil estrutura produtiva pesquera, e unha medida do todo inútil, pois o panorama globalizado da pesca converte a medida en irrisoria, xa que se dirixe únicamente ás flotas europeas", sinalan nun comunicado.
Desde Aetinape consideran que aos "grandes sacrificios" da pesca española para adaptarse ás "rixideces" da Política Pesquera Común, únese agora esta "absurda medida" que ao seu xuízo "creará novos problemas, violenta un sector convertido en sospeitoso e estenderá o hastío entre as poucas empresas que aínda desenvolven o seu proceso produtivo en España".
Para concluír esta Asociación insiste en que a asunción, cada vez máis xeneralizada dos criterios de Pesca Responsable por parte do sector en Europa, "converte esta medida en máis inútil e inapropiada, xa que os niveis de incidencias e contratempos creados polos profesionais da pesca son ínfimos".