Os seis detidos en Pontevedra eran "miembros destacados" da rede de roubo de coches de luxo
Por Alejandro Espiño
Seis das 31 persoas que, finalmente, figuran como detidas no marco da operación Aligustre-Orso residían na provincia de Pontevedra, principalmente na comarca do Salnés. Eran, segundo a Garda Civil, "membros destacados" dunha rede internacional dedicada ao roubo de vehículos de luxo en Europa, coches que posteriormente enviaban ao norte de África.
Así o destacou o coronel xefe da Garda Civil en Pontevedra, Miguel Estévez, que detallou que estas detencións leváronse a cabo nas últimas horas en Vilanova de Arousa, Cambados, A Illa de Arousa e Pontevedra. Ademais, realizáronse rexistros en Paredes (Vilaboa), onde tiña residencia un destes detidos, un home de orixe marroquí.
Todos eles "solían cambiar mucho de domicilio" e teñen un amplo historial de antecedentes policiais. Por esta operación, impútaselles -do mesmo xeito que aos outros detidos- os delitos de pertenza a organización criminal, falsificación de documentos, branqueo de capitais e receptación.
Xunto con estes seis detidos en Pontevedra, a rede quedou desartellada coa captura doutras dúas persoas en España, unha en Barcelona e outra en Granada, tres en Bélxica -entre eles o líder da organización- e o groso do operativo -20 persoas detidas-, en Italia.
A investigación, que foi desenvolvida pola Policía Xudicial da comandancia da Garda Civil de Pontevedra baixo a dirección do xulgado de instrución número 7 de Vigo, comezou en maio de 2015, por mor da incautación de dous vehículos de alta gama no porto da cidade olívica. Foran roubados en Italia e ían ser levados en barco a África.
A partir de aí descubriuse o modus operandi desta rede delituosa que, segundo Miguel Estévez, tiña unha estrutura "muy jerarquizada". Os coches roubados, todos eles con prezos de mercado próximos aos 100.000 euros, eran localizados principalmente en Italia, Bélxica, Portugal e Francia. Unha vez seleccionados, actuaban os membros residentes en España.
O coronel xefe da Garda Civil de Pontevedra explicou que a rede tiña a Galicia como "base" para poder subtraer eses vehículos sen ter que forzalos. Para iso, falsificaban a documentación dos coches e dos seus propietarios. A continuación presentábanse nos concesionarios oficiais de cada unha das marcas e obtiñan un duplicado das chaves.
Ditas chaves eran enviadas ao país onde se localizou o coche que querían roubar e, unha vez no seu poder, subtraíano e trasladábano a unha cidade con porto marítimo, entre elas Vigo, para exportalo cara ao norte de África.
Os membros da organización, para levar a cabo todo este operativo, utilizaban distintas identidades falsas, constituían empresas ficticias, abrían numerosas contas bancarias e realizaban constantes cambios de domicilio. Todo iso fixo que esta operación, na que participaron un centenar de axentes de España, Italia e Bélxica -co apoio de organismos internacionais como a Europol e a Eurojust- fose fuese "larga, laboriosa y complicada".
En total, puidéronse recuperar 44 vehículos de alta gama, aínda que os investigadores tratan de localizar aínda máis coches que xa serían entregados en África. Suman un valor de mercado superior aos tres millóns de euros. Nos rexistros tamén se interveu unha "considerable" cantidade de diñeiro en efectivo, material informático, móbiles e documentación "muy relevante" para a investigación.
Ademais, "otro tema de trabajo", segundo a Garda Civil, é coordinarse coa policía africana, especialmente en Marrocos e Senegal, para identificar os compradores destes coches "y ver la responsabilidad que pueden tener", xa que debido ao baixo prezo que pagaban por estes vehículos de luxo "nos lleva a pensar que tenían que saber que su origen no era lícito"", segundo o coronel xefe da Garda Civil en Pontevedra.