As Festas da Peregrina vanse mollar coa chegada das primeiras chuvias de agosto
Por Redacción
Unha fronte pouca activa cruzará Galicia de oeste a leste durante este mércores 17, segundo as previsións de Meteogalicia. Espérase unha xornada de ceos cubertos, con choivas débiles. As temperaturas situaranse entre os 16 e 22 graos. O vento soprará frouxo de compoñente sur durante a mañá para cambiar ao noroeste tras o paso da fronte.
Durante o xoves, a xornada será de transición á espera doutra fronte que entrará durante a madrugada do venres. Os ceos presentaranse con nubes altas durante todo o día ata que a últimas horas aparecerán nubes baixas que deixarán choivas na zona oeste da coomunidade. As temperaturas máximas roldarán os 24 graos. O vento soprará frouxo de compoñente oeste. Pola noite variará a frouxo do sur.
Xa o venres, a borrasca situada ao oeste de Irlanda enviará unha fronte fría que cruzará Galicia durante as primeiras horas. Os ceos estarán cubertos con choivas xeneralizadas, de intensidade moderada. Espérase unha tarde seca e con apertura de grandes claros. As temperaturas máximas sufrirán un lixeiro descenso. Os ventos soprarán frouxos de compoñente oeste.
O tempo tenderá a estabilizarse durante o fin de semana. coa entrada dun anticiclón que levará as temperaturas máximas a preto dos 30 graos.