Rescatan do mar un cadáver flotando na ponte da illa da Toxa
Por Redacción
Un equipo do servizo de Gardacostas de Galicia rescatou o corpo sen vida dunha persoa localizada na ponte da illa da Toxa. Con ela, había outras dúas persoas, unha delas resultou ilesa, e a outra tivo que ser atendida polos servizos sanitarios de urxencia, pois presentaba síntomas de hipotermia.
Segundo informou o 112, as persoas rescatadas con vida foron localizadas nunhas rocas: o ferido foi recollido polos voluntarios de Protección Civil da vila grovense, mentres que a persoa que resultou ilesa chegou a terra polos seus propios medios.
As forzas da orde investigan as circunstancias nas que se produciu o suceso, pero, nunha primeira aproximación aos feitos, parece que os tripulantes faenaban pola zona cando foron sorprendidos pola subida da marea.
O CAE 112 Galicia recibiu a alerta ás 3:30 horas desta madrugada. Os axentes da Garda Civil pediron medios para rescatar a dúas persoas que vían na auga, preto do Campo de Golf da Toxa. Sospeitaban que podía haber unha persoa falecida, como, posteriormente, confirmouse.
Así, os xestores do 112 Galicia puxeron os feitos en coñecemento do servizo de Gardacostas de Galicia, que mobilizou á zona o helicóptero Pesca-I, e pediron a colaboración de Urxencias Médicas. Tamén avisaron ao parque comarcal de Bombeiros do Salnés, de onde partiu un mergullador especializado no rescate subacuático, e aos voluntarios de Protección Civil da vila grovense.