A calor sufocante remitirá a partir deste martes
Por Redacción
A previsión dos técnicos de Meteogalicia apunta que mantéñense as condicións anticiclónicas e a presenza de aire cálido sobre Galicia neste comezo de semana, aínda que a entrada de aire algo máis frío en capas medias e altas da atmosfera ocasionará inestabilidade no interior.
Así, o ceo continuará pouco anubrado ou despexado nas Rías Baixas.
As temperaturas estarán sen cambios, polo que continuará a forte sensación térmica de calor. O vento soprará frouxo de compoñente norte con réxime de brisas costeiras nas Rías Baixas.
Durante a xornada do martes as altas presións comezarán a debilitarse dando entrada a unha masa de aire algo máis fría que a de días anteriores. Isto se traducirá na presenza de nubes baixas e néboas no litoral atlántico durante a mañá; pola tarde teremos en xeral unha alternancia de nubes e claros, sen desbotar algún fenómeno tormentoso no interior.
As temperaturas comezarán a diminuír, sendo o descenso nesta xornada máis notorio no litoral. O ventos soprará frouxo de dirección variable, tomando en xeral unha compoñente oeste durante a tarde.
Xa cara o mércores as altas presións localizaranse nesta xornada ao leste dos Azores, quedando Galicia no límite do seu radio de acción, o que permitirá que continúe entrando aire máis fresco e húmido que o de días anteriores.
Deste xeito teremos ceos parcialmente anubrados no litoral, con néboas matinais, tendendo a abrirse claros a medida que avance a xornada quedando pouco anubrados ou despexados no resto. As temperaturas descenderán de xeito entre moderado e notable, particularmente no interior da comunidade. Os ventos soprarán frouxos de compoñente norte.
Entre o xoves e o domingo a comunidade galega atoparase na influencia das altas presións que aportarán estabilidade e os ventos do nordés que non deixarán que as masas de aire moi cálido se instalen sobre Galicia. Deste xeito o ceo estará en xeral pouco anubrado ou despexado, con intervalos de nubes baixas no extremo norte e algún banco de néboa matinal no interior. As temperaturas serán as propias da época do ano, podéndose rebasar os 30 graos en puntos do interior e quedando por debaixo dos 25 graos no terzo norte.
Para o luns 25 non se agardan cambios significativos, polo que temos altas probabilidades de ter unha xornada de tempo seco e soleado.