Ponte Caldelas prohibirá o uso dos herbicidas químicos máis agresivos
Por Redacción
Os herbicidas a base de glifosato, unha sustancia cuxos efectos sobre o medio ambiente son moi criticados por colectivos ecoloxistas, van ser prohibidos en Ponte Caldelas. O goberno local, composto polos grupos municipais do PSdeG-PSOE, AVP e BNG, levará unha moción sobre este asunto ao Pleno ordinario deste mes de xullo.
O actual equipo de goberno está sensibilizado coa cuestión porque realiza campañas de desbroce durante a primavera e o comezo do verán, unha iniciativa novidosa que non se facía anteriormente e que ten por obxecto facilitar o acceso dos veciños dos 33 núcleos de poboación do municipio. Non obstante, as campañas realízanse por medios exclusivamente mecánicos, inocuos para o medio ambiente.
Por este motivo, ainda que xa non estaban a utilizar herbicidas agresivos, o goberno local quere regular este asunto explicitamente para que non se poida facer no futuro.
A Organización Mundial da Saúde cualificou hai pouco a este tipo de produtos como probablemente canceríxenos, unha resolución que, a xuízo do Concello de Ponte Caldelas, cómpre tomar en serio pois os herbicidas espállanse con moi pouco control.
Por outra banda, o texto da moción inclúe solicitar da Deputación e da Xunta de Galicia que cumpran cos mesmos criterios no desbroce das marxes das vías de titularidade provincial e autonómica que transcorren polo municipio.