O Concello e os empresarios de Sanxenxo destacan a repercusión turística da Euro Beach Soccer League
Por Redacción
Tanto o goberno local como o Consorcio de Empresarios Turísticos de Sanxenxo (CETS) fan un balance moi positivo da repercusión que a celebración en Silgar da Euro Beach Soccer League 2016 tivo para o sector durante esta fin de semana.
E é que as bancadas do estadio, instaladas na praia e cunha capacidade para máis de 2.500 persoas, rexistraron un cheo absoluto en moitos momentos da competición, especialmente durante os dous últimos encontros de cada xornada. As colas para acceder ao estadio foron avultadas nos horarios coincidentes cos encontros que disputaba, sobre todo, a selección española, que fixo que a capacidade das bancadas fora insuficiente para acoller a toda a afección que se dispoñía a animar ao seu equipo.
Ese ambiente deportivo tivo a súa repercusión no municipio, facendo que o parking de Nauta colgase o cartel de "completo" a media tarde do sábado, algo inusual a 9 de xullo, cando a tempada alta non comezou aínda.
A competición desprazou a Sanxenxo a máis de 500 persoas, entre corpo técnico e xogadores das 14 seleccións participantes e persoal das diferentes empresas contratadas pola organización e encargadas da montaxe e mantemento das instalacións así como da atención ao público asistente. Todos eles aloxados en establecementos hostaleiros do municipio e das inmediacións.
Jesús Sueiro, concelleiro de Deportes e Turismo, sente especialmente satisfeito coa repercusión que tivo este evento, que trouxo a Sanxenxo á elite do fútbol praia europeo "Conseguimos máis de un obxetivo. En primeiro lugar o ambiente festivo que se vivía nas instalacións do estadio trasladouse ás rúas e hubo durante toda a fin de semana esa animación nas rúas". Pero o que resulta de máis interese para Jesús Sueiro é a promoción da marca Sanxenxo a través deste evento deportivo. "Os partidos retransmitíronse a través de Gol TV, o que facilitou que millóns de persoas en toda Europa escoitasen falar de Sanxenxo e recibiran nas súas casas unhas imaxes espectaculares do noso pobo".
E tras o éxito deste primeiro evento deportivo, Sanxenxo prepárase xa para acoller o Campionato de España de Fútbol Praia de Seleccións Autonómicas, en categorías senior e xuvenil. Serán 12 seleccións senior e 8 xuvenís as que se despracen a Sanxenxo para participar neste evento, o que moverá a preto de 500 persoas de forma directa, entre xogadores e técnicos.
"Trátase dunhas categorías nas que os xogadores viaxan acompañados polas súas familias e a repercusión, a nivel de ocupación hoteleira e consumos no municipio, será ainda maior". Jesús Sueiro está convencido de que son eventos como este, que conjuguen turismo e deporte, os que van contribuír á dinamización do sector en Sanxenxo. Sueiro agradece, de forma especial, a colaboración altruísta dos voluntarios que participaron en tarefas como o recollido de pelotas durante estes tres días de competición, e que co seu labor contribuíron ao éxito do evento.