Tráfico inicia unha campaña para controlar o estado dos vehículos
Por Redacción
Axentes de Tráfico da DXT inician este luns 11 unha campaña especial de vixilancia para comprobar as condicións en que circulan os vehículos. A Dirección Xeral de Tráfico xustifica esta campaña na necesidade de garantir que o estado dos turismos cumpre cos requisitos da lexislación actual.
Ata o domingo 17 intensificaranse os controis nas estradas galegas e convídase aos diferentes concellos galegos a que se somen a esta iniciativa vixiando as condicións técnicas dos vehículos a través das Policías Locais.
Membros da Federación Nacional de Asociacións de Lesionados Medulares e Grandes Discapacitados Físicos (Aspaym) acompañarán aos axentes nalgúns dos controis nas provincias de Lugo e A Coruña. Trasladarán as súas experiencias persoais para lembrar aos condutores as conscuencias que pode levar o mal estado dun vehículo.
Segundo a DXT, dos preto de dous millóns de vehículos que están matriculados en Galicia, máis do 60% supera os 10 anos de antigüidade. No caso dos camións, a antigüidade media case se incrementou en 4, 7 anos, pasando dos 6,3 anos en 2011 aos 11,11 en 2015.
Esta circunstancia supón un factor de risco ao carecer dos equipamentos de seguridade máis recentes. Ao realizar unha comparativa no conxunto de España entre os accidentes ocorridos con vehículos de 10 a 15 anos de antigüidade e os de menos de 5 anos, apréciase que o risco de falecer ou resultar grave duplícase no primeiro caso.
QUE REVISARÁN OS AXENTES?
A DXT lembra unha serie de pautas para manter o adecuado estado dos vehículos:
- Pneumáticos. É imprescindible comprobar regularmente a profundidade do debuxo. O límite legal é de 1,6 milímetros, pero o recomendable é que a profundidade do oco teña un mínimo de 3.
- Iluminación e sinalización. Tan importante é ver como ser visto. As lámpadas van reducindo a súa intensidade co uso, polo que deben cambiarse cada 2 anos ou cada 40.000 km. Ademais, hai que manter sempre limpas as ópticas.
- Placas de matrícula. Deben ser perfectamente visibles e non estar deterioradas.
- Documentación do vehículo. Ademais do preceptivo permiso de conducir, deberase levar obrigatoriamente o de circulación do vehículo (ou unha autorización da Xefatura de Tráfico na súa ausencia) e o cartón da ITV co adhesivo correspondente visible na lúa dianteira.
Na campaña desenvolvida en xullo de 2015 denunciáronse a 1.154 condutores de 16.562 que foron controlados. A infracción que máis denuncias motivou no caso dos turismos estivo relacionada coa falta de revisión da ITV.