Educación investirá este ano 382.000 euros no CEIP de Chancelas
Por Redacción
Un total de 382.345 euros destinará a Xunta de Galicia ás obras de rehabilitación integral, tanto enerxética como funcional do CEIP de Chancelas.
Así o destacou o conselleiro de Cultura, Educación e Ordenación Universitaria, Román Rodríguez, nunha visita ao colexio. Será unha actuación, dixo, que busca mellorar o estado e habitabilidade do centro e garantir o conforto do alumnado.
Segundo explicou o titular do departamento educativo, a licitación desta obra acaba de publicarse no Diario Oficial de Galicia (DOG), co cal a previsión pasa por poder comezar cos traballos a finais de agosto e rematalos nun prazo de tres meses.
En concreto, a actuación centrarase nas carpinterías do edificio e na fachada, na iluminación e nos falsos teitos, dado que outras partes como a cuberta ou a caldeira xa foron obxecto de accións anteriores nos últimos anos.
Deste xeito, manteranse as cubertas, as fachadas e o chan existente, pero actuarase sobre as carpinterías, que se substituirán. Ademais, no interior das fachadas inxectarase illamento térmico. Por outro lado, cambiarase a iluminación actual co fin de mellorar a calidade da luz e mudaranse parte dos falsos teitos que presentan deficiencias, tendo en conta que no ano 2012 xa foran renovados os da zona de infantil.
Román Rodríguez destacou que a Consellería xa ten realizado importantes investimentos neste centro desde 2009. Contando esta reforma integral, o orzamento mobilizado no CEIP de Chancelas nos últimos sete anos ascende a máis de 580.000 euros.
A maiores desta obra de eficiencia enerxética, o departamento educativo da Xunta de Galicia tamén prevé levar a cabo este ano outras dúas actuacións en centros educativos do concello de Poio, como o son o CEIP Viñas, onde se acometerá un cambio de cuberta por 60.000 euros, e o IES de Poio, no que se reformará a conserxería cun orzamento de 20.000 euros.