A alameda de Ponte Caldelas acolle este sábado a primeira edición de Naturfeira
Por Redacción
Un evento no que haberá dende produtos artesanais, a alimentos saudables, pasando por actividades de todo tipo que teñen como común denominador un estilo de vida "a escala humana". É o que poderán atopar na alameda de Ponte Caldelas, este sábado 25 de xuño, todos os que se acheguen á primeira edición de Naturfeira.
Trátase dunha iniciativa cultural, gastronómica e de lecer orientada ao benestar. Está organizada pola asociación Calakux, radicada en Forzáns.
O Concello apoia esta iniciativa, facendo posible a súa celebración no espazo senlleiro da Alameda, onde se van instalar varias casetas para os distintos expositores e tamén un palco para a celebración das actividades musicais.
Os promotores defenden o obxectivo de traballar na formación dos cidadáns cara a un consumo consciente para o que organizan esta feira-mercado na que é posible atopar produtos de calidade, de agricultura ecolóxica, cosmética natural, pan bioartesán, herbas menciñais, artesanía, terapias naturais e tamén obxectos reciclados.
Ademais do mercado propiamente dito, que se vai celebrar entre as 11 e as 21 horas, a feira inclúe unha programación cultural paralela.
O programa previsto é o seguinte:
- 12.00 horas: Petra Marein, "acoustic looping".
- 13.00 horas: arte-terapia para nenos e maiores a cargo de Kira.
- 16.30 horas: andaina-debate polo rio, con Jesús Fuentes.
- 18.30 horas: Kira ofrece unha sesion de ioga.
- 19.30 horas: Actuación do coro Valdarrosa.
- 20.15 horas: A música de Iván Gulín (guitarra) e Carlos do Viso (zanfoña e voz).
Durante todo o día, Anxo Moure animará a Naturfeira coas súas cantigas e xogos.