Choiva ata aburrir durante toda a semana
Por Redacción
A predicción dos técnicos de MeteoGalicia para esta semana non pode ser máis desalentadora.
Para o luns anuncian a entrada dunha masa de aire húmido á nosa comunidade. O que significa que teremos que agardar ceos anubrados, con chuvias débiles bastante xeneralizadas durante a mañá, aínda que a situación tenderá a mellorar pola tarde con apertura progresiva de claros. As temperaturas estarán sen cambios significativos. Os ventos soprarán de compoñente oeste, frouxos en xeral.
O caso é que o martes, esas baixas presións localizadas sobre Irlanda continuarán aportando inestabilidade e aire frío para a época do ano. Isto deixará un día de ceos moi anubrados e chuvias en xeral de carácter débil e intermitente, aínda que durante a tarde no interior poderán acadar intensidade puntualmente moderada. As temperaturas tenderán a descender de xeito que continuarán marcándose valores baixos para a época do ano. Os ventos soprarán do suroeste, tendendo a aumentar a intensidade durante a tarde.
Ainda o mércores Galicia continuará na influencia das baixas presións localizadas ao norte da península Ibérica polo que a inestabilidade será predominante. Isto quere dicir que teremos unha xornada de ceos moi anubrados con chuvascos xeneralizados que pola tarde poderían vir ocasionalmente acompañados de aparato eléctrico. As temperaturas continuarán en valores suaves, aínda que algo baixos para esta época do ano. Os ventos soprarán de compoñente oeste, moderados, tendendo a rolar a norte a medida que avance a xornada.
A situación do xoves e o venres non mellora e as probabilidades de chuvia seguen a ser altas, ainda que polo menos as temperaturas se recuperan un chisco.