Sanxenxo investigará as verteduras de Nanín para recuperar a praia para o baño
Por Redacción
A concellería de Medio Ambiente de Sanxenxo iniciará unha investigación para determinar as causas que provocan os índices de contaminación na praia de Nanín co obxectivo de poder recuperar este espazo para a zona de baño.
Coral González-Haba, a concelleira desta área, afirma que o problema da calidade das augas de Nanín remóntase ao ano 2006, segundo o goberno local. Naquel momento rexistráronse unhas analíticas que ofrecían índices alarmantes de coliformes na auga. No ano 2007 pechouse ao baño esta praia pola elevada presenza de microorganismos fecais na auga, que podían resultar perigosos para a saúde dos bañistas.
A concelleira comprometeuse cos veciños e co sector hostaleiro a tratar de recuperar a praia para o baño.
MEDICIÓNS EN AREAS
Coral González-Haba manifestou que os mellores resultados do últimos catro anos nos controis microbiológicos na praia de Areas correspóndense co ano 2015.
Neste sentido, desde o goberno local de Sanxenxo indícase que as analíticas previas ao comezo da campaña de verán realizadas en Areas o pasado 27 de maio ofreceron un resultado "excelente" nas dúas zonas nas que se recolleron as mostras.