A selectividade comeza a dicir adeus tras 42 anos
Por Redacción
Alumnos de toda Galicia enfróntanse dende este mércores e ata o vindeiro venres aos temidos exames de selectividade. Non son unha xeración máis, son os protagonistas da última convocatoria dunhas probas que botaron a andar hai xa 42 anos e polas que pasaron, dende entón, medio millón de galegos.
Moitas cousas cambiaron e outras, pola contra, permanecen inalterables: os mesmos nervios, as mesmas gañas de que este momento pase o máis rápido posible e un idéntico desexo, conseguir a prezada nota que lles dea acceso a titulación desexada e, con ela, ao futuro profesional soñado.
A primeira proba foi Lingua castelá e literatura. Nesta primeira toma de contacto puideron elixir entre unha opción cun comentario de texto sobre os refuxiados que se completaba con Antonio Machado, Crónica de una muerta anunciada de Gabriel García Márquez, o Romanticismo ou o teatro anterior á Guerra Civil, e unha segunda opción cun texto sobre a xestión das emocións dos adolescentes e preguntas sobre La Fundación de Antonio Buero Vallejo, Plenilunio de Antonio Muñoz Molina, poesía do século XX e o Realismo e Naturalismo.
A primeira xornada completouse cos exames de Historia de España e Historia de Filosofía e, pola tarde, Lingua Galega e Literatura e Lingua Estranxeira.
Un total de 1.078 mozos reuníronse no campus pontevedrés para facelos exames da selectividade. Destes, 483 realizan estas probas na Escola de Enxeñaría Forestal e outros 595 na Facultade de Ciencias Sociais e da Comunicación.
Tamén houbo 14 alumnos de toda Galicia que acudiron ao Centro de Recursos Educativos (CRE) da ONCE en Pontevedra para facer os exames ante o tribunal especial. Son mozos con todo tipo de casuísticas: problemas de ansiedade, epilepsias, discapacidades visuais, trastornos por déficit de atención con ou sen hiperactividade ou disléxicos que solicitaron que se teña en conta a súa especificidade á hora de realizar as probas.
AS NOTAS O VINDEIRO DÍA 17
Tras uns merecidos días de descanso, os estudantes poderán coñecer, a través do correo electrónico, as súas cualificacións o vindeiro día 17 a partir das 20.00 horas e, para aqueles que non estean conformes, terán do 18 ata o 21 para solicitar unha segunda corrección e reclamación.
O período de preinscrición para matricularse nos diferentes graos do Sistema Universitario Galego será do 20 de xuño ao 1 de xullo e o primeiro prazo de matrícula será do 13 ao 15 de xullo.