Gustavo Rodríguez, nomeado novo decano en funcións de Fisioterapia
Por Redacción
Despois de que o proceso electoral aberto na Facultade de Fisioterapia o pasado mes de abril co propósito de elixir novo decano ou decana se pechase sen que se presentasen candidaturas, o profesor do Departamento de Bioloxía Funcional e Ciencias da Saúde Gustavo Rodríguez vén de ser nomeado polo reitor novo decano en funcións deste centro do campus pontevedrés.
Á fronte dun equipo que completan as docentes Iris Machado como vicedecana e Lourdes Maceiras como secretaria académica, Rodríguez Fuentes toma o relevo de Eva María Lantarón na dirección desta facultade, co primeiro obxectivo de completar os preparativos para o curso académico 2016-2017.
Segundo informa o Diario da Universidade de Vigo, a"Acabamos de aterrar e agora mesmo o que realmente nos preocupa é pechar toda a programación do próximo curso, intentar organizalo o máis rápido posible”, sinala este profesor da Área de Fisioterapia, que incide en que o primeiro eixo do seu traballo serán definir os horarios, calendarios de exame e guías docentes das materias para completar a programación do vindeiro ano académico".
É un nomeamento que vén de producirse na presente semana, cunha resolución do reitor, Salustiano Mato, que lle encomenda tamén ao novo decano en funcións a convocatoria dunhas novas eleccións.