Os colexios Carballal e A Xunqueira II, elixidos para implantar un programa para o desenvolvemento do talento nas aulas
Por Redacción
O CEIP Carballal de Marín e o IES A Xunqueira II de Pontevedra foron seleccionados entre o grupo de nove centros educativos de toda Galicia nos que a partir do próximo curso académico 2016-2017 se implementará o proxecto Piteas, un programa de formación e mentoring para o desenvolvemento do talento da Fundación Barrié, a Universidade de Santiago de Compostela e a Consellería de Cultura, Educación e Ordenación Universitaria.
Piteas inclúe iniciativas de formación de profesorado para a optimización da detección e do desenvolvemento do talento nas aulas, así como accións directas de fomento da creatividade e as ciencias, co alumnado.
O navegante, explorador e científico grego do século IV A.C. Piteas soubo unir ciencia, esforzo e talento para construír unha nova mirada sobre o mundo que lle rodeaba. Por ese motivo serve de metáfora para o que pretende ser este proxecto, co que a Fundación Barrié márcase o obxectivo de ofrecer ideas e ferramentas científicas e pedagóxicas que potencien o traballo colaborativo, as metodoloxías activas e o desenvolvemento do talento persoal e colectivo.
O programa terá unha duración de catro cursos académicos e a súa implementación nas aulas comeza en setembro, pero a formación a profesores xa comezou con talleres e conferencias na sede da Fundación Barrié en Vigo ás que asistiron en maio membros do equipo docente dos nove centros seleccionados. Do CEIP Carballal acudiron seis profesores, segundo informou o centro este luns.
O programa baséase en modelos científicos recoñecidos a nivel internacional e convenientemente adaptado á realidade educativa, económica e cultural de Galicia. Segundo indica a Fundación Barrié, nace da necesidade de tomar conciencia do papel fundamental que xoga a promoción do talento na evolución da sociedade. Cada persoa deber de ter a oportunidade de desenvolver o seu potencial ao nivel máis alto posible, deste xeito contribúe a un progreso social baseado na produción científica e creativa.
Piteas busca optimizar o proceso do ensino e, en consecuencia, a aprendizaxe en todos os niveis educativos que permite dar unha resposta educativa adecuada ás diferentes características e necesidades, ritmos e estilos de aprendizaxe, motivacións, situacións sociais e identidades culturais de todo o alumnado, favorecendo ao máximo o seu desenvolvemento como persoa, aproveitando o seu potencial, enriquecendo a experiencia compartida do grupo.