Detida por un roubo con forza nun bazar chinés en liquidación
Por Redacción
Axentes da Policía Nacional detiveron unha muller de 43 anos de idade, veciña de Pontevedra, con antecedentes policiais, como presunta autora dun roubo con forza nun establecemento da cidade.
Segundo informaron fontes oficiais da Comisaría Provincial de Pontevedra, o pasado 24 de maio presentaba denuncia o propietario do bazar chinés en liquidación da rúa Cobián Roffignac esquina coa rúa do Rouco, no que accederan tras forzar o cristal da porta de emerxencia.
Tras fracturar o cristal da porta de acceso revolveron todo o interior e o propietario notou en falta 90 reloxos, 20 lapis de memoria, 40 cartóns de memoria, 6 altofalantes, 190 aneis de bixutería, 48 paquetes de pilas, 30 chisqueiros, 16 lámpadas, catro canas de pescar, útiles de pesca e unha tableta.
Por mor da denuncia iniciáronse as investigacións para pescudar a identidade do presunto autor da subtracción. Unha vez identificada esta persoa os axentes localizárona o día 27 de maio ás 16.00 horas na rúa Casimiro Gómez de Pontevedra. Os axentes procederon á súa detención por un delito de roubo con forza e ao seu traslado a dependencias policiais.
Nos últimos días a Comisaría de Pontevedra tivo noticia de varios sucesos similares en varios bazares da cidade.