Unha falsa alarma por un incendio nunha oficina bancaria mobiliza á Policía e os Bombeiros
Por Redacción
Unha falsa alarma por un incendio nunha entidade bancaria mobilizou este martes a efectivos do Corpo de Bombeiros e a Policía Local de Pontevedra ata a rúa Augusto González Besada. Recibiron unha alerta porque saía un forte cheiro a fume da oficina, pero, tras revisar todas as instalacións, comprobouse que non había lume e deuse traslado do aviso aos servizos de mantemento.
Todo ocorreu sobre as 11.10 horas da mañá deste martes na sucursal de Caja España. Os bombeiros recibiron un aviso de que había un forte cheiro similar ao provocado por un incendio que saía do interior da oficina e unha dotación trasladouse ao lugar.
Á súa chegada, non había lume nas instalacións, pero, de todos os xeitos, interviñeron e varios efectivos revisáronas para tentar localizar a orixe do cheiro. Tras media hora nas instalacións, concluíron que o cheiro podería estar a saír do conduto do aire acondicionado, pero non había lume.
A intervención do Corpo de Bombeiros motivou o traslado dun camión que se situou xusto diante da entidade bancaria, o que motivou un pequeno atasco. Os vehículos estiveron sobre 20 minutos detidos, xerando retencións porque non podían seguir circulando pola rúa, pero pouco despois moveron o camión e xa se puido circular.
Ao lugar tamén se trasladou a Policía Local de Pontevedra, que regulou a circulación e ofreceu apoio á intervención dos bombeiros, pero finalmente non foi necesario que realizasen maiores intervencións ao confirmar que non se detectaba houbo e se tratou dunha falsa alarma.