Detido por roubar 600 sementes de marihuana nun local comercial de Sanxenxo
Por Redacción
A Garda Civil detivo un veciño de Sanxenxo, de 21 anos, como suposto autor dun roubo con forza nun establecemento comercial da localidade.
O dono do comercio presentou o pasado luns 23 de maio unha denuncia no Posto Principal da Garda Civil de Sanxenxo polo roubo de 600 sementes de cannabis e 600 euros en metálico, que se produciu tras romper o cristal lateral do establecemento.
Tras proceder ás pertinentes investigacións, os axentes localizaron e detiveron ao suposto autor dos feitos na tarde do martes, localizándose no seu poder as sementes, aínda que non o diñeiro en metálico.
O detido, que segundo informa a Garda Civil conta con amplos antecedentes policiais, foi posto a disposición do Xulgado de Instrución 4 de Cambados, quedando en liberdade con cargos.