Aumenta o número de mozos pontevedreses consumidores de cannabis
Por Redacción
É barato, doado de conseguir, ten unha boa imaxe, os seus efectos nocivos non son moi coñecidos, hai permisividade social... todos estes factores están a facer que o cannabis sexa unha droga de consumo sinxelo e iniciático. O último estudo feito polo Plan Nacional sobre Drogas revela que case un de cada cinco mozos de entre 15 e 34 anos admite fumar porros.
Pontevedra non é allea a esta circunstancia.
Os datos cos que conta a Concellería de Benestar Social recollen unha baixada continuada no consumo do tabaco, unha baixada aínda que cun lixeiro repunte nos últimos tempos no consumo de alcohol e un aumento preocupante no consumo de cannabis.
Rematada o programa escolar de prevención de condutas adictivas deste curso, a Concellería de Benestar Social Municipal porá en marcha nas próximas semanas un programa de accións de verán que abrirá as portas a outros colectivos.
A concelleira de Benestar Social, Carmen Fouces, e a responsable do programa de Prevención de Condutas Adictivas, Patricia González, fixeron un balance das actividades desenvolvidas nos centros educativos e tamén amosaron a súa preocupación polo uso abusivo que fan os rapaces dos móbiles e novas tecnoloxías.
Neste senso explicaron que están acabando de recoller e comezarán a procesar a enquisa sobre os uso das novas tecnoloxías realizada entre os escolares que participaron nos obradoiros de prevención. Os resultados e conclusións saberanse á volta de verán e serán determinantes para definir intervencións ad hoc se fose preciso.
Neste curso foron máis de 3.000 os alumnos, de primeiro a cuarto da ESO, os que participaron nos obradoiros de prevención de condutas adictivas. Ademais 150 pais participaron nas escolas de familia e máis de 5.000 estudantes asistiron a sesións informativas e actividades de debate vencelladas á prevención.
As accións de verán programadas polo departamento municipal de Prevención de Condutas Adictivas son as seguintes:
- Concurso de fotografía e vídeo. Dirixido aos estudantes universitarios. Quérese aproveitar a creatividade dun campus como o pontevedrés para que capturen imaxes e fagan propostas (videoclips) que poidan servir para desenvolver unha campaña de prevención. Repartiranse 2.000 euros en premios.
- Curso para formar mediadores xuvenís. Dar ferramentas e cualificar a xente nova que traballe ou conviva con adolescentes co fin de que saiban detectar e intervir fronte a rapaces con condutas adictivas ou en risco de caer nelas.
- Escolas de familias. Neste caso dirixidas a nais atendidas nos servizos sociais do Concello.
- Obradoiro de música en colaboración co Secretariado Xitano. Dirixido a adolescentes de etnia xitana. Utilizarase a música como elemento de cohesión, para fomentar a autoestima.
Relacionadas:
-
Comezan os obradoiros de prevención de condutas aditivas nos institutos
Por Redacción |
-
Os colexios pontevedreses elixen entre un catálogo de 43 actividades municipais este trimestre
Por Redacción |
-
Un estudo municipal busca determinar se os mozos pontevedreses son adictos ao móbil e á Internet
Por Alejandro Espiño |
-
Se mastigas chicle enganas ao alcoholímetro?
Por Natalia Puga & Mónica Patxot |
-
Premios a os mellores carteis preventivos
Por Mónica Patxot |
-
Os adolescentes fórmanse para "tomar decisións en liberdade" ante o consumo de alcohol, drogas ou Internet
Por Redacción |