Indignación en Caritel polo roubo do monumento ao can de palleiro
Por Redacción
Veciños de Caritel e de Forzáns amosaron a súa indignación polo roubo do monumento ao Can de Palleiro ubicado desde o ano 1973 na entrada da Pousa e que fora colocado por Manuel Cordo Boullosa, filántropo e millonario galego afincado en Portugal que pasou a súa infancia, tras morrer a súa nai, neste lugar compartido polas parroquias de Caritel e Forzáns, en Ponte Caldelas.
A desaparición do monumento descubriuse a primeiras horas deste venres, por parte dos veciños da zona.
A entrañable estatua en homenaxe ao Can de Palleiro fora encargada polo fundador da petroleira lusa Galp ao afamado escultor pontevedres José Luis Penado, autor entre outras moitas obras do loro Ravachol, na Peregrina, ou o Monumento aos Navegantes, nas Palmeiras de Pontevedra.
Os ladróns levaron non só a estatua de bronce senón tamén a súa base de pedra polo que se sospeita que tiveron que ser varios os autores do roubo e utilizar algún tipo de guindastre para poder perpetrar esta substración.
O monumento ao Can de Palleiro é a segunda vez que é obxecto do roubo pois xa desaparecera do seu emprazamento ao pouco tempo da súa inauguración, pero despois de ser recuperado, Manuel Cordo Boullosa encargou ao escultor José Luis Penado que reforzara a súa anclaxe para evitar novas actuacións dos amigos do alleo que, nesta ocasión ao non poder levarse só a estatua tiveron que cargar tamén coa base pétrea que a soportaba.