O polbo galego, en veda ata o mes de xullo
Por Redacción
Ata o próximo 4 de xullo, o polbo estará en veda en Galicia. Así o especifica a resolución do plan experimental para a xestión desta especie para a actual campaña extractiva.
A veda será efectiva desde este venres ás catro da tarde.
As capturas desembarcadas este 20 de maio poderán ser comercializadas tamén mañá naquelas lonxas nas que tradicionalmente se viñesen realizando vendas de polbo os sábados.
O período de veda do polbo significa que queda expresamente prohibida a captura desta especie, por medio de calquera arte, en augas nas que Galicia ten competencias en marisqueo.
Polo tanto, as embarcacións dedicadas á captura de polbo con nasas deberán retiralas do seu calado e levalas a porto. Este tempo de veda é tamén aplicable á pesca marítima de recreo e ás capturas acadadas con calquera outra arte distinta da nasa para polbo.
A veda, segundo recorda a Consellería do Mar, é unha das medidas técnicas que comprende o plan de experimental do polbo, co fin de axustar a xestión pesqueira ao ciclo de vida da especie e así protexer a súa reprodución e contribuír a unha explotación máis sustentable.