Ponte Caldelas contará cun parque infantil con tirolina no prazo de dous meses
Por Redacción
A Xunta de Goberno de Ponte Caldelas proxecta renovar o parque infantil no prazo de dous meses. Así o acordaron as tres forzas que integran o goberno conformado polo PSOE, BNG e AVP.
A obra contará cun orzamento de 40.000 euros e contempla a reforma integral do parque actual que se atopa moi deteriorado. Este espazo aínda non está adaptado á normativa e conta con randeeiras metálicas e de cadeas, ata o punto de que recentemente se chegou a eliminar unha malla de corda que causaba feridas nas mans dos menores.
O novo proxecto pretende ser o máis moderno da zona e estará dividido en dous espazos, un para os nenos máis pequenos e outro para a de máis idade. Este novo parque contará cunha tirolina, solicitada polos escolares. O goberno local de Andrés Díaz tamén ten previsto instalar unha rede-pirámide de escalada. Ademais quérese crear unha montaña de xogos con tobogán, unha cama elástica e unha ampla oferta de bambáns e carrandiolas.
Para o alcalde trátase dun proxecto no que se puxo moito interese e resulta ilusionante. Segundo Díaz, os parques mantivéronse moi abandonados durante os últimos anos e, por este motivo, considera necesario realizar a reforma que proporcione maior seguridade a este espazo de xogos.