O Grove busca a mediación de Cores Tourís para axilizar o servizo municipal de Emerxencias
Por Redacción
O alcalde do Grove, José Cacabelos, pediu este luns a mediación do delegado territorial da Xunta en Pontevedra, José Manuel Cores Tourís, de cara a que se axilice a sinatura dun convenio entre o concello, a Xunta de Galicia e a Deputación de Pontevedra que garanta o financiamento do servizo de Emerxencias para o municipio meco, unha demanda xa vella na localidade.
Cacabelos reuniuse este luns con Cores Tourís e coa concelleira de Obras, Servizos e Infraestruturas do Grove, Ángeles Domínguez, para analizar as necesidades de mellora na seguridade viaria no municipio e a situación do servizo de Emerxencias.
En relación con este último punto, Cores Tourís confirmou que dará traslado da demanda deste concello ante a Consellería de Presidencia, con competencias en materia de emerxencias.
Segundo informou a Xunta a través dun comunicado, o delegado territorial e o alcalde do Grove tamén analizaron as necesidades actuais de mellora nas estradas do municipio en materia de seguridade viaria.
Neste tema, Cacabelos solicitou que se instalen pasos de peóns elevados na entrada do Grove, entre a estación de servizo e o hotel Bahía, ao que o delegado territorial recordou que por normativa non sería posible a instalación destes pasos elevados, pero sí duns semáforos que regulen o tráfico. O rexedor aceptou a opción.
O alcalde tamén demandou labores de conservación e limpeza da estrada que une A Lanzada coa zona de Ardia e a reforma de dúas vías do municipio, a rúa Teniente Domínguez e a rúa Luis A. Mestre, o que permitiría mellorar o tránsito por estas estradas e gañar en seguridade tanto para os peóns como para os vehículos. En relación a estas obras, José Manuel Cores Tourís recordou ao alcalde que o concello tería que encargarse, pola súa banda, de instalar os servizos.