O codillo estofado, protagonista na alameda da Lama
Por Redacción
A Festa do Codillo volveu a confirmar a súa gran acollida. Tanto que este ano se esgotaron todas as racións do prato elixido, o codillo estofado con patacas asadas e guarnición, antes de que finalizase a degustación.
De novo, a Alameda do municipio encheuse de centos de persoas que probaron o codillo preparado pola empresa Cátering Arelas, ao prezo de 12 euros a ración.
O bo tempo e a afluencia masiva de persoas a este evento non só por parte de veciños do municipio da Lama senón de gran número de visitantes de toda a provincia converteu nun éxito de participación a presente edición da Festa do Codillo da Lama que chegou a ocupar os asentos habilitados debaixo de dúas carpas xigantes que cubrían todo o recinto da praza.
A organización habilitou dúas carpas, en lugar dunha como viña sendo habitual, e conseguiu que se enchesen todos os asentos habilitados para o gozar do evento.
Tamén os establecementos situados nas inmediacións estiveron abarrotados de público e os postos de polbo, empanadas e demais produtos galegos de calidade atenderon a demanda dos asistentes.
A festa estivo presidida polo alcalde da Lama, Jorge Canda, que foi o encargado de recibir ás autoridades, entre elas, a presidenta da Deputación, Carmela Silva, o deputado Santos Héctor e o alcalde de Ponte Caldelas, Andrés Díaz.
Ademais de poder degustar o popular codillo, acompañaron esta xornada de exaltación gastronómica unha exposición de moto vespas e a música e o bo humor da Charanga Os Encerellados, así como unha serie de actividades para nenos desenvolvidas durante a sobremesa pola Asociación Xuvenil Propón.
Relacionadas:
-
A Festa do Codillo da Lama recibe un milleiro de comensais e bate o seu propio récord
Por Redacción & Diego Torrado |
-
O codillo estufado con guarnición, opción elixida para a XVII Festa do Codillo
Por Redacción |
-
A Lama espera superar o récord de asistentes na Festa do Codillo
Por Redacción |
-
Codillo estofado con patacas asadas e guarnición, menú para o 15 de maio na Lama
Por Redacción |