Impulsan en Pontevedra un programa de apoio sociosanitario a maiores
Por Redacción
Persoas maiores que viven sos ou acompañados de parellas de idade avanzada ou dependentes. Serán os beneficiarios dun novo programa de apoio que porá en marcha a concellería de Benestar Social, segundo avanza o goberno municipal.
O obxectivo é prestarlles unha axuda moi concreta: facer as pequenas curas derivadas de caídas da cama ou no traxecto ao baño que sofren case sempre pola noite e, se fose preciso, asealas co fin de que poidan ter un mellor descanso após o incidente.
Trátase dunha necesidade de atención sociosanitaria detectada polos servizos sociais do Concello a partir dos informes redactados pola Policía Local que é quen responde ás chamadas de auxilio destas persoas, case sempre maiores e case sempre pola noite.
Os axentes acoden aos domicilios e erguen e axudan a deitarse de novo a persoa e ademais se ven ou sospeitan que poda estar ferida de consideración ou a atopan en mal estado chaman ao 061. Fan unha avaliación da situación e chegado o caso tamén alertan aos servizos sociais.
A Policía Local atende arredor de medio cento de chamadas ao ano de persoas maiores ou dependentes que non teñen quen lles axude cando caen. De entrada os servizos de emerxencia non acoden xa que entenden que non se trata dun problema sanitario, polo que os axentes son o seu recurso.
Co fin de completar o auxilio prestado polos axentes locais, a concellería de Benestar Social disporá dun auxiliar de enfermería para darlle os coidados sociosanitarios aos maiores ou persoas dependentes que o precisen. Este servizo asistencial estará en marcha o próximo mes de xuño.