A Lama espera superar o récord de asistentes na Festa do Codillo
Por Redacción
O Concello da Lama espera superar este domingo 15 de maio o seu récord de asistentes á XVI Festa do Codillo cun prato servido en estofado con patacas e guarnición, preparación que resultou escollida na cata realizada hai uns días no Consistorio.
A xornada estará amenizada pola música e o bo humor da charanga Os Encerellados, o baile e a música tradicional dos Coribantes de Buchabade e tamén haberá, durante a sobremesa, xogos para toda a familia coordinados pola Asociación Propón.
O alcalde, Jorge Canda, sinalou que a Alameda da Lama atópase perfectamente acondicionada para acoller a XVI Festa do Codillo onde se situaron as dúas grandes carpas que servirán para acubillar aos preto de mil comensais que se espera recibir para esta ocasión.
A empresa Grupo Galego de Cátering Arelas, de Vincios (Gondomar) será a encargada de servir o codillo estofado con patacas asadas e guarnición, prepración gañadora, por unanimidade do xurado, na cata realizada por un grupo de persoas que escolleu este tipo de preparación.
Tamén probaron o "Codillo á Mazá", con pisto de calabacín e arroz branco, así como "Codillo á Cazadora", con espinacas salteadas e pementos do piquillo recheos que, aínda que a xuízo dos catadores estaban magníficos, decantáronse polo "Codillo Estofado".
Jorge Canda manifestou a súa satisfacción polo gran interese que levanta esta festa non só entre os residentes no municipio senón entre os centos de persoas que se achegan ata A Lama para participar neste evento de exaltación gastronómica dun dos manxares máis populares de Galicia, neste caso o codillo.
Ao redor dun milleiro de racións previstas pola organización poñeranse este domingo á venda ao prezo de 12 euros e van acompañadas de pan e viño, así como un prato de barro e servizos co fin de poder favorecer a degustación deste manxar que desde hai anos homenaxéase e exalta na Alameda da Lama.
Como vén sendo habitual, na contorna da Praza da Pedreira colocaranse postos de artesanía popular así como de doces tradicionais galegos como as saborosas filloas de Valongo e outras ofertas culinarias complementarias do propio codillo.
Relacionadas:
-
A Festa do Codillo da Lama recibe un milleiro de comensais e bate o seu propio récord
Por Redacción & Diego Torrado |
-
O codillo estufado con guarnición, opción elixida para a XVII Festa do Codillo
Por Redacción |
-
O codillo estofado, protagonista na alameda da Lama
Por Redacción |
-
Codillo estofado con patacas asadas e guarnición, menú para o 15 de maio na Lama
Por Redacción |