Arranxan as desfeitas provocadas na Ruta da pedra e da auga
Por Redacción
O Concello de Meis acaba de acometer varias actuacións dentro do municipio, entre as cales se atopa a reparación de parte dun tramo da súa famosa Ruta da pedra e da auga que o presidente do goberno en funcións, Mariano Rajoy, puxo de moda nos informativos nacionais coas súas camiñadas durante as vacacións.
Durante os pasados temporais a ruta sufriu numerosos danos por culpa das riadas. O máis destacado foi a desfeita nunha ponte de paso que está situada na zona do Muiño de Salcedas deixando o camiño totalmente intransitable e cortado o seu acceso.
Estas reparacións desbloquearon este paso quedando de novo totalmente aberto. Nestes traballos usáronse materiais acordes a súa contorna.
As actuacións realizadas na parroquia de San Martiño concretamente no lugar de Lamas consistiron na ampliación dos camiños ás vivendas, onde os propietarios dos terreos cooperaron cedendo parte destes.
Tamén se aproveitaron estes días para limpar as pistas e cunetas nos lugares de Outeiro, Luxio e Quintáns.
O goberno local de Meis ten previsto seguir con estas actuacións noutros moitos puntos do municipio.