Zafarrancho de limpeza e roza nos camiños do rural marinense
Por Redacción
Como cada ano, ao chegar a primavera o Concello de Marín inicia a campaña de acondicionamento dos camiños do rural. Esta medida levará a cabo durante os meses de primavera e verán, que é cando a vexetación ten un desenvolvemento máis vigoroso. Ademais, coincidindo co período estival a vila rexistra un repunte no número de visitantes, tanto pola celebración de numerosas festas nos barrios como pola chegada de turistas ás súas praias.
O calendario de execución dos traballos acomodarase á celebración de eventos festivos e terá a punto a zona de costa nos primeiros meses do verán. Así mesmo, para a realización dos traballos nas zonas máis estreitas empregarase unha brigada a pé con operarios da Fundación Xoán XXIII, reservando a roza das pistas e estradas de competencia municipal para o tractor do concello.
Ademais o calendario de intervencións contempla que se realice a roza nos barrios comprendidos ente a estrada vella de Marín, o linde con Pontevedra e a estrada provincial EP-0019 en maio.
En xuño acondicionaranse os barrios comprendidos entre a liña de costa e a estrada PO-550 desde a Escola Naval ata Lapamán e en xullo e agosto realizarase a limpeza dos principais núcleos de poboación dos barrios situados na outra marxe da estrada PO-550, incluíndo os que están na parte alta de Marín por exemplo Pastoriza, Macenlle, Igrexario e outros da zona.
Cada vez máis ao longo dos anos en que vén prestando o servizo os veciños reclaman os restos das rozas para tratalos como abono ou como pasto para os animais. Así é que como novidade do servizo este ano cabe a posibilidade de realizar puntos de provisión nos barrios, ben sexa para que os veciños os leven ou para realizar puntos de compostaxe co asesoramento técnico dos operarios da Fundación Xoán XXIII.
Esta experiencia de traballo foi exposta con boa acollida no marco das I xornadas ambientais realizadas en Marín baixo a organización do Ateneo Santa Cecilia e o patrocinio do Concello de Marín.