Os veciños piden o acondicionamento do Camiño do Roque
Por Redacción
O voceiro do PP de Poio, Ángel Moldes, visitou recentemente o Camiño do Roque invitado por residentes na zona, que lle trasladaron a necesidade de que o Concello asuma o acondicionamento e a pavimentación deste vieiro veciñal, situado no linde entre os lugares da Armada e O Pereiro.
O voceiro popular estivo acompañado de Fernando Losada, residente do Pereiro que concorreu nas listas do PP nas últimas eleccións municipais e leva tempo recollendo as queixas dos veciños sobre a situación deste carreiro.
Segundo os veciños, este camiño -a cabalo entre San Xoán e Combarro-, é moi utilizado por veciños de ambas as dúas parroquias. Losada explicou que xa lle solicitaron o seu acondicionamento ao Concello en numerosas ocasións, “e aínda non recibimos resposta”.
Losada apuntou tamén que, segundo os moitos veciños do Pereiro e A Armada que o utilizan, “o camiño, cando chove vólvese impracticable”.
Tras inspeccionar o lugar, Moldes confirmou que o martes que ven os representantes populares na comisión informativa de Urbanismo trasladarán outra vez as peticións dos veciños e preguntarán polo acondicionamento e pavimentación deste camiño.
Moldes tamén recibiu información sobre outras demandas veciñais relacionadas coas infraestruturas e servizos na zona, que o voceiro do PP asegurou que estudará e trasladará á maior brevidade.