Precintan o parque infantil da praia fluvial de Ponte Caldelas
Por Redacción
Os operarios municipais de Ponte Caldelas procederon ao precintado do parque infantil existente nas inmediacións da praia fluvial.
A acción combinada da humidade, as enchentas do río Verdugo e os destrozos provocados polos actos vandálicos fan inviable manter abertas estas instalacións que quedan agora pechadas para o uso dos cativos.
Segundo manifestou o alcalde, Andrés Díaz, a intención do equipo de goberno é poder optar a unha subvención da Xunta ou da Deputación para poder substituir este parque de madeira por outro con homologación europea e con maiores garantías de seguridade para o seu uso.
REPOSICIÓN DE TRES LUMINARIAS
Por outra banda, o alcalde conseguiu a través da Federación Galega de Municipios e Provincias (Fegamp), da que é membro da súa executiva, que se incluíra a Ponte Caldelas no plan de axudas deseñado pola Xunta para paliar os efectos dos temporais nos diversos concellos galegos.
Grazas a esta intervención a administración autonómica afrontará o custe da reposición de tres farolas existentes no paseo da Calzada, próximas á praia fluvial, que foran destrozadas por mor a acción das enchentas do río Verdugo.