Pequenas retencións en Poio por unha saída de vía na avenida da Barca
Por Redacción
Un aparatoso accidente provocou pequenas retencións na circulación de vehículos a entrada e saída de Pontevedra e Poio pola avenida da Barca na mañá deste sábado. O sinistro non deixou danos persoais, pero si materiais nun vehículo.
O accidente produciuse sobre as 10.00 horas deste sábado e houbo un único vehículo implicado. Por motivos que se descoñecen, o coche saíuse da vía pola marxe dereita e golpeou o valo protector que separa o viario do centro comercial A Barca.
O condutor do vehículo non resultou danado nin houbo máis coches implicados, pero a roda dianteira dereita quedou esnaquizada, de modo que durante un pequeno intervalo de tempo o coche quedou no medio da calzada, dificultando a circulación. Ao lugar acudiron rapidamente efectivos da Policía Local de Poio, que indicaron que a inciencia quedou emendada rapidamente.
Segundo indicou a Policía Local, moveron o coche para un lateral, de tal modo que non obstaculizase o paso do resto de vehículos e apenas se produciron atascos. Testemuñas presenciais si referiron pequenas retencións.