Cidadáns propón un concurso de ideas para combater o feísmo no centro histórico
Por Redacción
Buscar unha solución ao impacto visual que supón a localización e abandono dos colectores de lixo no centro histórico. É o obxectivo da moción que presentará Cidadáns ao próximo pleno municipal para acabar con este problema de "feísmo urbano", segundo indicou a súa portavoz, María Rey.
Estes colectores de lixo "distorsionan a beleza da nosa zona monumental", denunciou María Rey, que suma a esta situación outros elementos en superficie como os armarios das compañías de cable que non se integran na contorna e aos que tamén se debería ofrecer unha solución estética.
Así, unha das ideas que propón Cidadáns é a convocatoria dun concurso de propostas para mellorar a estética dos colectores de lixo e integralos dentro da zona monumental. A proposta é pedir proxectos aos estudantes da Facultade de Belas Artes de Pontevedra para mellorar o centro histórico.
Desta forma, segundo a concelleira, non só se melloraría o aspecto da cidade, senón que tamén se potenciaría a relación entre a universidade e a sociedade pontevedresa "ofrecendo ao tempo visibilidade ao talento do alumnado desta carreira".
"Contamos cun dos centros históricos mellor conservados de Galicia e, por isto, debemos mantelo nunhas condicións agradables tanto para as persoas que veñen visitalo como para as pontevedresas e pontevedreses que o percorren día a día", engadiu Rey.