A Deputación e o Concello de Ponte Caldelas falan da creación dunha senda peonil en Parada
Por Redacción
O deputado provincial de Mobilidade, Uxío Benítez, reuniuse este xoves co alcalde de Ponte Caldelas, Andrés Díaz Sobral, para falar da creación dunha senda peonil en Parada. No encontro falaron tamén das actuacións previstas na rede provincial dentro do municipio ao abeiro do Plan Móvese, que prevé intervencións de calmado do tráfico coa instalación de pasos de peóns sobreelevados, redutores de velocidade e zonas 30.
O rexedor de Ponte Caldelas solicitou ao deputado a senda peonil na EP-0206, no lugar de Parada, entre a ermida de San Vicente e o entronque coa estrada autonómica que une Pontevedra con Ponte Caldelas (PO-532). Trátase dunha vía que ten un alto número de persoas que se desprazan a pé, polo que o obxectivo é facilitar unha zona de seguridade pola que poidan transitar sen perigo.
Uxío Benítez recibiu a petición e asegurou que concorda plenamente coa liña de criterios que ten a nova Deputación, que pretende fomentar e potenciar os desprazamentos peonís en contornos de seguranza viaria. "Entendemos que as estradas teñen que deseñarse para que as persoas se comuniquen… os coches están no último lugar da prioridade á hora de actuar, polo que esta proposta será estudiada para poder levala adiante", subliñou.
No encontro, no que tamén estivo presente a directora de Mobilidade, Isabel Pardo de Vera, tamén se puxeron sobre a mesa as solicitudes que o Concello de Ponte Caldelas realizou ao abeiro do Plan Móvese. O Goberno municipal requiría á Deputación para limitar zonas peonís, reforzar as sinalizacións de velocidade máxima, así como para a instalación de redutores de velocidade, lombos ou bandas transversais en seis vías.
Neste sentido, Benítez destacou que os técnicos provinciais están a rematar o estudo das peticións municipais e facendo unha valoración económica das futuras actuacións, xa que houbo unha avalancha de solicitudes dentro da primeira fase por parte de moitos concellos da provincia.
Por outra banda, Benítez comprometeuse a mellorar a estrada provincial que vai a Pazos (EP-0202), que se vai a reparar logo da mala execución dunha actuación do anterior goberno provincial. Será preciso fresar todo o asfalto e facer un rasanteo ademais de botar un novo aglomerado, para o que hoxe mesmo estivo alí xa o contratista responsable da obra.