Queres ser policía local en Bueu?
Por Redacción
Seis policías locais contratará o Concello de Bueu de cara o verán. Catro deles traballarán como auxiliares na vila durante tres meses e dous durante dous meses. Todos serán elixidos tras un rigoroso proceso de selección e os interesados poderán anotarse a partir deste mércores 20 de abril.
As bases poden verse no taboleiro de anuncios e na web municipal, e o prazo de inscrición estará aberto durante cinco días hábiles.
As solicitudes faranse mediante instancia dirixida ao alcalde que estarán dispoñibles na páxina web e no Rexistro do Concello, ademais de que os aspirantes deberán someterse a unha serie de probas selectivas.
A primeira vai dirixida a comprobar a estatura e a aptitude física, mediante os exercicios de forza, resistencia, axilidade, flexibilidade e velocidade. A continuación desenvolverase unha proba de coñecementos sobre o dominio dos contidos incluídos no temario do anexo e sobre a toponimia local.
O último exercicio consistirá na tradución dun texto do galego ao castelán e outro do castelán ao galego, cuxa función é comprobar o grao de coñecemento da lingua galega (do que estarán exentos os que acrediten o CELGA 3).
As bases tamén establecen que todos os aspirantes que teñan superado o proceso de selección deberán participar nun curso de formación que desenvolverá a Academia Galega de Seguridade Pública, salvo no caso de que se teña certificado de asistencia do citado curso.