Poio investirá 155.000 euros en obras de saneamento no ámbito do Laño
Por Redacción
Case 155.000 euros investirá o Concello de Poio nos próximos meses nun novo proxecto de saneamento. Trátase dunha actuación levará a cabo na avenida do Laño, entre o cruzamento que vai a Armenteira e a nave do conserveira Cámping.
Con esta actuación, incluída nas partidas que lle corresponden a Poio polo Plan Concellos 2016 que puxo en marcha a Deputación de Pontevedra, o goberno municipal avanzará na rede de saneamento de Covelo.
Segundo explicou a concelleira de Obras, Chelo Besada, a obra consiste en dotar de saneamento a ambos os dous lados da estrada PO-308 nese tramo e, ademais, procederase a separar as augas pluviais das fecais.
Nas próximas semanas avanzarase na licitación deste proxecto pero, en todo caso, as obras non comezarán ata despois do verán, xa que segundo destaca a concelleira socialista, "non podemos facer os traballos en época de praia", ante o aumento do tráfico nesa estrada autonómica durante os meses estivais.
Ademais, o goberno municipal ultima unha segunda obra de saneamento. Neste caso, trátase dun proxecto co que se completará a instalación deste servizo no Camiño Pomar, tamén en Samieira.
Chelo Besada lembra que quedaban "unhas oito casas" sen conexión que, tras esta obra, quedarán conectadas ao colector principal do municipio, que chegaba só ata o camiño que conduce ao cemiterio.
Tamén nesta zona farase a correspondente separativa de pluviais e fecais para evitar que as choivas poidan colapsar as redes de saneamento.