Arrestan a un home por facer un "sinpa" nunha gasolineira alterando a matrícula con cinta illante
Por Redacción
A Garda Civil detivo un veciño de Moaña como suposto autor dun delito continuado de falsidade documental por alterar as placas de identificación do seu vehículo.
A investigación e as cámaras de seguridade da estación de servizo de San Simón puideron determinar que, en polo menos dúas ocasións, o home, de 42 anos de idade, abandonou sen pagar a gasolineira tras encher manualmente nos seus surtidores de combustible.
Segundo informaron fontes oficiais do Instituto Armado, as imaxes das cámaras, a inspección dos axentes e o material incautado no vehículo permitiron demostrar que o condutor empregou en varias ocasiones cinta illante de cor negra para manipular a matrícula e tentar evitar así a identificación. El vestía con chaquetón longo e pescozo subido, cun gorro que dificultaba a súa identificación na cámara.
Para a matrícula usaba a cinta illante, polo que na orixinal púidose comprobar tamén a alteración polo uso asiduo deste material. A cinta valeulle para cambiar algún 3 por un 8, chegando a cambiar o nome da provincia.
A alerta saltou o pasado día 1 cando a Garda Civil foi notificada de que un condutor enchera 21,62 euros de carburante e foise sen pasar por caixa.
Os axentes esperaron na peaxe de Figueirido e alí deron o alto e identificaron o condutor e dono do vehículo, un Seat-Ibiza de cor verde. Tras a identificación deixáronlle continuar a marcha pero eles foron á estación de servizo de San Simón para visionar a cinta das cámaras.
Nas imaxes puideron recoñecer ao home que pouco antes acababan de identificar. Ao investigar os feitos e revisar outras cintas, a Garda Civil recoñeceu de novo a esta persoa utilizando o mesmo modus operandi uns días antes na mesma estación de servizo. Nesa ocasión foise da gasolineira sen pagar os 38 euros de combustible cos que cargou o seu vehículo.
Axentes da Unidade de Seguridade Cidadá (USECIC) localizaron o domicilio desta persoa, á que lle consta un amplo historial de antecedentes policiais. A detención produciuse días despois nas inmediacións da súa residencia, onde se localiza o vehículo. No asento traseiro atopouse un gorro negro, que podería ser o utilizado por esta persoa cando vai encher o vehículo, tentando ocultar o seu rostro.