Sanxenxo selecciona persoal novo para o Servizo de Emerxencias
Por Redacción
Oito persoas dun total de dez aspirantes forman parte da bolsa de persoal que o Servizo de Emerxencias de Sanxenxo utilizará para cubrir as baixas, reforzos e vacacións do equipo habitual que realiza este servizo na vila turística.
Estes oito aspirantes superaron a primeira proba, tipo test, e durante este mércores 13 desenvolveron actividades prácticas, que unha vez se puntúen permitirán establecer unha listaxe definitiva de persoal. A partir de aí, o Concello por rigorosa orde chamará a estes novos efectivos para cubrir as necesidades do servizo.
Os aspirantes realizaron dúas probas prácticas. A primeira consistía na montaxe, colocación e desmonte dun equipo de respiración autónomo, tendo que empregalo nunha intervención coa conexión da máscara.
A segunda proba centrouse na excarceración dunha persoa atrapada. Para iso foi necesario que acendesen a bomba, simulasen unha despresurización do circuíto e conectasen a súa ferramenta para a súa operación.