Marín pide á Deputación que amplíe a ponte sobre o río Loira
Por Redacción
A alcaldesa de Marín, María Ramallo, solicitou á Deputación de Pontevedra dúas novas actuacións en estradas do municipio, a maiores que as incluídas no Plan Móvese da institución provincial.
Trátase do ensanche da ponte sobre o río Loira na estrada EP-1202, que une Seixo e Santo Tomé de Piñeiro, e da regulación do tráfico no cruzamento desta estrada coa EP-1201, o viario que vai de Marín a Penizas.
Así llo trasladou a rexedora marinense ao deputado de Mobilidade, Uxío Benítez, e á directora provincial nesta materia, Isabel Pardo, nunha reunión celebrada nas dependencias da Deputación.
En canto á mellora do cruzamento, a proposta do goberno local de Marín pasa por deseñar unha glorieta que permita unha circulación de vehículos máis fluída, especialmente durante os meses de verán, unha solución que estudarán agora os técnicos da institución provincial, segundo sinalou a Deputación.
Na reunión tamén se repasaron as solicitudes que o Concello de Marín incluíu no Plan Móvese relativas ao acougado de tráfico nas estradas provinciais que atravesan o municipio, como a instalación de reductores de velocidade e de pasos de peóns elevados co obxectivo de mellorar a seguridade viaria.