Catro rutas de sendeirismo para dar a coñecer o patrimonio de Bueu e a súa contorna
Por Redacción
A concellería de Deportes de Bueu organizará, ata o próximo mes de xuño, catro rutas de sendeirismo co obxectivo de dar a coñecer o patromonio e a contorna do municipio.
A primeira das rutas terá lugar este sábado 16 de abril cunha andaina gratuíta destinada a divulgar a figura do pintor Urbano Lugrís, deseñador das capelas dos Santos Reis ou as mámoas de Castiñeiras. Ademais ao longo de sete quilómetros faranse paradas no Pazo do Casal, Pazo de Castrelo, Pazo de Santa Cruz, estaleiro de Banda do Río e Museo Massó.
A inscrición pódese realizar no departamento municipal de Cultura e Deportes cun máximo de 40 prazas e preferencia para as persoas empadroadas en Bueu.
A seguinte ruta organizarase o sábado 30 de abril, cun paseo de 10 quilómetros a beiras do río Verdugo con entrada ao castelo de Soutomaior.
O 14 de maio os participantes nestas xornadas poderán coñecer a contorna do Miño-Tea cunha distancia de 18 quilómetros e unha dificultade media-alta.
Para pechar as rutas, o 4 de xuño realizarase un roteiro pola Illa de Sálvora e a zona intermareal da Lanzada.