Chaman ao alumnado a mobilizarse ante a "mercantilización do ensino"
Por Redacción
Para reclamar a derrogación da Lomce e do chamado "Decreto do 3+2" que posibilita a implantación de graos de tres anos e que "procura unha vez máis a mercantilización do ensino público" a organización estudantil Erguer convocou unha xornada de folga no ensino o vindeiro mércores 13 de abril.
Para afondar nos motivos desta mobilización, os representantes da organización en Pontevedra ofreceron este xoves unha rolda de prensa na Facultade de Ciencias Sociais e da Comunicación, na que chamaron ao alumnado universitario e de ensino medio a "baleirar as aulas" e participar na manifestación que partirá ás 12.00 horas da Praza da Peregrina.
Paulo Queiruga e Rebeca Cambeiro deron lectura a un comunicado no que denunciaban os "ataques ao ensino" que supoñen medidas como a Lei Orgánica para a Mellora da Calidade Educativa (LOMCE), unha normativa "confesional, antipedagóxica, privatizadora, clasista e patriarcal, que afonda na falla de igualdade de oportunidades" como salientou Queiruga.
Mais tamén denunciaron que estes ataques "non se deteñen no ensino medio" senón que continúan no universitario co decreto do 3+2, que, ao seu xuízo, ten como obxectivo "converter as universidades nun criadeiro para as empresas".