Detido por roubar dúas veces na mesma tenda de roupa de Sanxenxo con dous meses de diferenza
Por Redacción
A Garda Civil detivo un veciño de Sanxenxo de 20 anos, de iniciais FJ.F.P., como presunto autor de dous delitos de roubo con forza por ter presuntamente actuado co mesmo modus operandi na mesma tenda de roupa con dous meses de diferenza, en xaneiro e marzo deste ano 2016.
Os feitos ocorreron os días 25 de xaneiro e 28 de marzo. Segundo denunciou o propietario da tenda, o suposto autor rompeu o cristal dunha das xanelas do establecemento cun obxecto contundente, accedeu ao seu interior e subtraeu diñeiro e efectos.
Nunha das ocasións logrou subtraer un computador portátil e 1.200 euros en efectivo e noutras diversas pezas de roupa, gorras e outros efectos que foron valorados, xunto cos danos ocasionados no local, en 1.500 euros.
As investigacións realizadas pola Garda Civil de Sanxenxo deron os seus froitos esta semana e este mércores e o mozo foi detido e puideron ser recuperados no seu domicilio os efectos subtraídos e parte do diñeiro. O mozo autorizou voluntariamente o rexistro domiciliario.
O mozo quedou en liberdade e deberá comparecer no Xulgado de Instrución número 1 de Cambados cando sexa requirido.