Que fan os bombeiros entre biberóns e chupetes?
Por Redacción
Os 28 nenos da Escola Infantil da Xunta en Pontevedra que asistiron este mércores ao centro participaron nun simulacro de incendio que permitiu comprobar a eficiencia dos protocolos de Prevención de Riscos das instalacións.
Segundo apuntaron os responsables do Servizo de Prevención de Riscos da Delegación Territorial da Xunta en Pontevedra, dende que se detectou o “problema” na cociña da Galiña Azul ata que os nenos chegaron ao punto de encontro que é a explanada de Campolongo tardáronse 4 minutos 15 segundos, estando todo o persoal do centro e os alumnos na rúa en 2 minutos 15 segundos despois de dada a alarma de incendios.
No simulacro participaron os Bombeiros de Pontevedra, o persoal que atende ao centro e 28 dos 36 alumnos cos que conta, xa que algúns non asistiron hoxe á Escola Infantil.